वासिङ्गटन: आगामी शुक्रबार डोनाल्ड ट्रम्पको ४५औं अमेरिकी राष्ट्रपतिको औपचारिक शपथग्रहण कार्यक्रम अमेरिकी कांग्रेसका २६ सांसदले अस्वीकार गर्ने भएका छन् ।
अमेरिकामा दुई सदनात्मक ब्यवस्थापिका संसदलाई राष्ट्रिय कांग्रेस भनिन्छ । तल्लो सदन (प्रतिनिधि सभा) र माथिल्लो सदन (सिनेट) समेत गरी यसको दुवै सदनमा सदस्य संख्या जम्मा ५ सय ३५ छ ।
केही दिनअघि मात्र अमेरिकी नागरिक आन्दोलनका अगुवा तथा डेमोक्र्याटिक पार्टीका सम्मानित सदस्य जोन लुइसले ट्रम्प वैधानिक राष्ट्रपति नभएको धारणा राखेपछि ट्रम्पले उनको चर्को आलोचना गर्दै सिंगो डेमोक्र्याटिक पार्टीलाई समेत तथानाम गाली गरेका थिए ।
यसको कडा प्रतिबादस्वरुप २६ जना डेमोक्र्याट कांग्रेस सदस्यहरुले औपचारिक शपथ ग्रहण समारोह बहिष्कार गर्ने बताएका हुन् ।
युरोपमा ट्रम्पको तीब्र आलोचना
यसैबीच, नवनिर्वाचित डोनाल्ड ट्रम्पले बेलायती र जर्मनी पत्रिकालाई अन्तर्वार्ता दिँदै बेलायतले युरोपेली संघ त्याग गर्नेबारे गरेको पूर्वनिर्णयको प्रशंसा गरेका थिए ।
उनले बेलायतले जस्तै अन्य देशले पनि बिस्तारै युरोपेली संघ त्याग गर्दै जाने विश्वास व्यक्त गरेपछि युरोपमा उनको कडा आलोचना सुरु भएको छ ।
ट्रम्पले ठूलो संख्याका शरणार्थीलाई जर्मनीमा स्वगत गर्ने जर्मनीकी चान्सलर एन्जेला मर्केलको नीतिको पनि तीब्र आलोचना गरेका थिए ।
उनको यस्ता अभिव्यक्तिहरु बर्लिन र पेरिसले पटक्कै रुचाएका छैनन् । तत्कालै प्रतिक्रिया दिँदै चान्सलर मर्केलले युरोपेलीहरुको भाग्य आफ्नै हातमा रहेको बताइन् ।
साथै उनले युरोपेलीहरुबीचको वलिष्ठ एकता नै ट्रम्पलाई गतिलो जबाफ हुने भन्दै कडा आलोचना गरेकी छन् ।
ट्रम्पको ब्रेक्जिटको अभिव्यक्तिको जवाफ दिँदै चान्सलर मर्केल र र फ्रान्सका राष्ट्रपति फ्रास्वाँ ओलान्दले युरोप आफ्नो मूल्य मान्यताबाट निर्देशित हुने बताएका थिए ।
उनीहरुले आफ्नो मार्ग तय गर्न बाहिरिया उपदेशको आवश्यकता नरहेको भन्दै अनावाश्यक टिप्पणी नगर्न पनि चेतावनी दिएका छन् ।
