कालिकाेट- कालिकोटको साविककाे धाैलागाेह गाविसको खानेपानी आयोजनामा अनियमितता भएको आरोप लागेको छ । युवा संघ नेपालका केन्द्रीय लेखा समिति सदस्य वकिल बमले खानेपानी आयोजनामा चरम भ्रष्टाचार गर्ने गाविस सचिव विष्णुकान्त प्याकुरेललाई कारवाहीको माग गरेका हुन् । बम कालिकोटमा बासिन्दा हुन् ।
बमका अनुसार धाैलागाेह गाविसका सचिव विष्णुकान्त प्याकुरेल खानेपानी योजनाका उपभोक्ता समितिका अध्यक्ष हुन् । अध्यक्ष भएर प्याकुरेलले हालसम्म योजना पूरा नगरी अनियमितता गर्दा भतेडाको मुहानबाट वडा नम्बर १, २ र ३ का जनताले अहिलेसम्म खानेपानी नपाएको भन्दै बमले कारवाहीको माग गरेका हुन् ।
उनले भनेका छन्– ‘कालिकोट जिल्ला धाैलागाेह गाविसका सचिव विष्णुकान्त प्याकुरेल उक्त गाविस खानेपानी योजनाका उपभोक्ता समितिका अध्यक्ष भई हालसम्म योजना पूरा गरेका छैनन् । भतेडाको मुहानबाट ३ वडाका को जनताले अहिलेसम्म पानी खान नपाएको हुँदा सम्पूर्ण बजेट भ्रष्टाचार गरी नेपाल सरकारको खरिदार सरहको कर्मचारीले पानी नखुवाएको हुँदा दुःख व्यक्त गर्न चाहन्छु । निजलाई सम्बन्धीत निकायले कारवाही गरोस् ।’ उक्त आयोजना बनेपछि सो क्षेत्रका हजारौं स्थानीय लाभाम्वित हुनेछन् । दैनिक नेपालबाट
