कालिकाेट– प्रमुख प्रतिपक्षी दल नेपाली कांग्रेसले मंगलबार सरकारविरुद्ध देश भर प्रदर्शन गर्ने क्रममा कालिकोटमा पनि प्रर्दशन गरेको छ । नेकपा नेतृत्वको सरकारले अधिनायकताको बाटोमा अग्रसर भएको भन्दै कांग्रेसले कालिकोटमा विरोध प्रदर्शन गरेको कांग्रेस जिल्ला सहसचिव दमन शाहीले जानकारी दिए । उनले सरकार लोकतान्त्रिक मूल्य मान्यता विपरित हिंडेकाले त्यसको रक्षा गर्न कांग्रेस आन्दोलित हुनु परेको बताए ।
संघीय व्यवस्थाको भावनाविपरीत अधिकारको केन्द्रीकरण गर्ने, शक्ति पृथकीकरणको सिद्धान्तलाई खिल्ली उडाउँदै स्वतन्त्र न्यायालयप्रति आक्रामक रूपमा प्रस्तुत हुने, संवैधानिक निकायलाई कार्यकारीको छाँयामा राख्ने, सरकार र पार्टी एकैजस्तो गरेर सञ्चालन गर्ने, कर्मचारीतन्त्र तथा सुरक्षा निकायहरूलाई व्यवसायिक रूपमा सञ्चालन गर्नुको सट्टा पार्टीप्रतिको प्रतिवद्धताका आधारमा चलाउने प्रवृत्ति सरकारमा बढेकाले आन्दोलित हुनुपरेको नेपाली कांग्रेस कालिकोटका सभापति हर्षबहादुर बमले बताए ।
कालिकोटमा मंगलबार विहान १२ : ३० बजे प्रतिमा चौकबाट सुरु हुने जुलुस, जिरो प्वाइन्ट, हुँदै मान्मको बजारमा कोणसभामा परिणत भएको छ । कोणसभालाई कांग्रेसका सभापति र अन्य तहका नेताहरुले सम्बोधन गर्ने गरेका छन् । जिल्लाको प्रर्दशनमा नेपाल तरूणदल, नेविसंघ र महिला संघलगायतका भातृय संगठनले पनि भाग लिएका छन् । देशैभर विभिन्न जिल्ला सभापतिहरुले आन्दोलनलाई शसक्त बनाउने जनाएका छन् ।
