कालिकोट– जिल्लाको नरहरिनाथ गाउँपालिकाको सम्पर्क कार्यालयमा ताला बन्दि गरिएको छ । नेपाली काँग्रेस कालिकोटले कार्यालयमा ताला लगाएको हो । गाउँपालिका प्रमुख धिरबहादुर बिष्टले विकास निर्माणमा समन्वयकारी भुमिका नगरी एकलौटी रुपमा शासन लादेको भन्दै कार्यालय घेराउ गर्दै ताला बन्द गरिएको छ । नरहरिनाथ गाउँपालिकामा कर्मचारी नियुक्ति, योजना बाँडफाँड, उपभोक्ता समिति गठन प्रक्रियालगायतका काममा आफ्ना आशेपासेलाई भर्ति गरेको काँग्रेसले आरोप लगाएको छ । गाउँपालिका जनप्रतिनिधिले गरेका नराम्रा कामको खबदारीका लागि गत भदौ ३१ गते १६ बुद्धे असहमति पत्र काँग्रेसले पेश गरेको थियो । उक्त असहमतिलाई समझदारी नगरी झनै वेवास्ता गरेको तत्कालीन स्थानीय चुनावमा अध्यक्ष पदबाट पराजित भएका मिनबहादुर बोगटीले बताए ।
परानै उपभोक्ता नियुक्ती
मंगलबार तालाबन्दीपछि नेपाली काँग्रेस कालिकोटले पत्रकार सम्मेलन गरेको थियो । पत्रकार सम्मेलनमा ताला लगाउनुको मुख्य काराण गाउँपालिकामा लागु भएका प्रत्येक योजनामा अनियमितता गरेको आरोप लगाइएको छ । गत आर्थिक बर्षमा लागु भएका योजना पुरा नभएको चौतर्फी गुनासो छ । तर, गाउँपालिकाको गाउँ कार्य समितिले पुराना उपभोक्तालाई नै पुनः जिम्मेवारी देखिएको छ । सडक निर्माणका लागि जनशक्ति प्रयोग नगरि डोजरलाई मोटाउने काम गरिएको आरोप लगाइएको छ । गाउँपालिले तिन ठुला सडक योजना निर्माण गर्दा तत्कालीन एमाले र माओवादीका नेता कार्यकर्ताललाई उपभोक्ताको जिम्मा गाउँपालिकाले दिएको भन्दै काँग्रेसल विरोध गरेको छ ।
नेपाली काँग्रेसलाई विकास निर्माणबाट पाँखा लगाएर एकलौटी राज गरिएकाले ताला लगाउन बाध्य पारिएको नेपाली काँग्रेस कालिकोटका प्रबक्ता नगेन्द्र बिष्टले बताए । गाउँपालिका अध्यक्ष र गाउँ कार्य समितिले शिक्षा ऐन अध्ययन नगरेर काम गरेको छ । राहत दरबन्दीलाई अस्थायी र अस्थायी दरबन्दीलाई राहतमा मिलागरेको बताइएको छ । कानुनलाई लात हान्ने काम गाउँपालिकाले गरेको काँग्रेसका जिल्ला सहसचिव दमन शाहीले बताए ।
गत आर्थिक बर्षमा गरिएका कामको सार्वजनिक सुनुवाइ गरिनु पर्ने, गाउँपालिकाले लागु गरेका ऐन राजपत्रमा प्रकाशित गरिनु पर्नेलगायतका १६ बुद्धे असहमति पत्र काँगेसले गाउँपालिकालाई बुझाएको थियो । पत्र बुझाएको १५ दिन वितिसक्दा पनि गाउँपालिकाले वेवास्ता गरेको काँग्रेस नेता कार्यकर्ताले असन्तुष्टी जनाएका छन् । १६ बुद्धे माग पुरा नभएसम्म ताला नखोल्ले काँग्रेसले बताएको छ । गाउँपालि अध्यक्ष, उपाध्यक्ष लगायतका जनप्रतिनिधि गाउँपालिकामा गएका छन् । यता सदरमुकाममा रहेको सम्पर्क कार्यालयमा भने ताला लागेको छ । कार्यालयमा रहेको लेखापाल हिरा बोहोराले १६ बुद्धे असहमति पत्रमा गाउँपालिकाले हेरफेर नगरेकाले ताल लगाउँछौ भन्दा आफु काम गरि रहेको अवस्थामा कार्यालय बाहिर आएको बताए ।
ठुलो बजेट अनियमितताको आरोप
गाउँपालिका अध्यक्षले आफू निकटका उपभोक्ता समिति बनाएर ठुलो रकम अनियमिता गरेको आरोप नेपाली कांग्रेस कालिकोटका प्रवक्ता नगेन्द्र विष्टले लगाए । ‘एकलौटी रुपमा आफु निकटलाई उपभोक्ता समिति बनाएर अनियमिता भएको छ ।’ उनले भने, ‘आर्थिक अनियमिताको बिषयमा चासो राख्दा गाउँपालिका कुनै प्रतिक्रिया नदिएका कारणले तालाबन्दी गरेका हौँ ।’ लालिघाटदेखि गाउँपालिका जाने सडक र खुलालु–माल्कोट हुदैँ कुमालगाउँ जाने सडक निर्माणमा ६ करोड रुपैयाँ अनियमिता भएको दाबी गर्दै उनीहरूले रकम फिर्ता गर्न माग गरेका थिए ।
नरहरिनाथ गाउँपालिकाका निर्माण ब्यवसायी संघका अध्यक्ष ध्रुबबिक्रम शाहीले पनि अनियमितता भएको रकमको विषयमा प्रष्ट नपारेको कारण तालावन्दी भएको बताए ।
रिसले ताला लगाए : अध्यक्ष विष्ट
गाउँपालिकाले तिब्र रुपमा विकास निर्माणका काम गरेकाले कांग्रेसले रिसका कारणले सम्पर्क कार्यालयमा तालाबन्दी गरेको गाउँपालिका अध्यक्ष धीरबहादुर विष्टले बताएका छन् । आफूहरुले अनियमिता नगरेको र उपभोक्ता समितिलाई प्राबिधिक इस्टमेटका आधारमा बिल भुक्तानी गरेको आधारहिन आरोप लगाएकै कारणले गाउँपालिकाको कार्यालयमा तालाबन्दी नगरेर सम्पर्क कार्यालयमा तालाबन्दी गरेको गाउँपालिका अध्यक्ष विष्टले बताए । ‘हामीले उपभोक्ता समितिलाई प्राबिधिक इस्टमेटकै आधारमा विल भुक्तानी गरेका छौँ ।’ उनले भने,‘आधारहिन आरोप लगाएर खाली प्रचारमा आउनका लागि तालाबन्दी गरेका हुन् ।’
