२३ पुस, काठमाडौं । मधेसी जनअधिकार फोरम लोकतान्त्रिकका अध्यक्ष विजयकुमार गच्छदारले यथास्थितिमा आफ्नो दलले संविधान संशोधन विधेयकलाई समर्थन गर्न नसक्ने बताएका छन् । साथै सरकारले संसदमा दर्ता गरेको संशोधन प्रस्ताव परिर्माजन नगरी समस्या समाधान नहुने दाबी समेत गरे ।
रिपोर्टर्स क्लब नेपालको ज्ञापन पत्र बुझ्दै गच्छदारले ७ प्रदेशले मुलुकको समस्याको समाधान नगर्ने जिकिर गरे । ८ प्रदेशको सहमति तोडिएकाले नै अहिलेको अवस्था आएको दाबी गर्दै उनले भने, झापा, मोरङ, सुनसरी, कैलाली र कञ्चनपुर निकै विवादित जिल्ला रहँदै आएका छन्, तर यो संशोधन प्रस्तावले यसको कुरा गरेको छैन, त्यसैले यथास्थितिमा हामीले समर्थन गर्दैनौं ।’
यो विधेयकमा थारुहरुप्रति ठूलो धोका भएको भन्दै उनले पूर्वको एउटा प्रदेश बनाउनु पर्ने र कैलाली र कञ्चनपुरलाई ५ नम्बर प्रदेशमा राख्नुपर्ने माग अघि सारेका छन् ।
सरकारले संसदमा दर्ता गराएको संविधान संशोधन विद्येयकमाथि आफ्नो पार्टीले संशोधन हाल्ने र त्यही प्रस्ताव पारित गराउनको लागि मतदान गर्ने उनले बताए ।
आफ्नो पार्टी कुनै पनि अतिवादको पक्षमा लागेको पार्टी नभएको जिकिर गर्दै उनले भने, ‘मैले मुलुकको निकासको लागि जहिलेपनि मध्यमार्गी भूमिका निर्वाह गरेको छु, चाहे त्यो संविधान जारी गर्नको लागि होस् चाहे अरु बेला नै किन नहोस्, अहिलेपनि म सहमति र निकासका लागि दलहरुसँग छलफलमा छु ।’
प्रमुख दलहरुवीच सहमति, सहयकार्य र एकताको अहिलेपनि उतिकै खाँचो रहेको उनले बताए ।
